Школьный библиотечный сайт

Ризаэтдин Фәхретдин укулары: телебез бетә барганда сабыр итүдән ни файда?

angel — Mon, 30 Jan 2017 06:16:08 GMT

Материал чыганагы: Азатлык Радиосы, сылтама: http://www.azatliq.org/a/28265153.html?ltflags=mailer

27 гыйнвар Чаллыда Татарстанның татар теле һәм әдәбияты, тарих укытучылары, музей җитәкчеләре, тәрбия эшләре өчен җаваплы мәктәп мөдирләре катнашында Риза Фәхретдин укулары узды. Чарада милли мәгарифнең бүренге хәле турында җитди сөйләшү булды.

Соңгы берничә елда Чаллыда узган татар җыен-җыелышларында совет чоры исләре һәм хисләре өстенлек ала башлаган иде. Ниһаять, калада беренче тапкыр Ризаэтдин Фәхретдин укулары узды һәм биредә милли мәгарифнең торышы ни дәрәҗәдә булуын чамаларлык фикерләр дә әйтелде.

Чара шәһәрнең 52нче санлы мәктәбендә үткәрелде. Килгән кунакларны күргәзмәләр, “Моңлы курай” балалар ансамбле татар көйләрен уйнап каршы алды. Тантана башында мәктәп укучылары Ризаэтдин Фәхретдиннең “Әсма яки гамәл вә җәза” (1903) әсәреннән өзек күрсәтте.

Сәхнәдә “Әсма, яки гамәл вә җәза” әсәреннән өзек

Татарстанның барлык төбәкләреннән җыелган татар теле һәм әдәбияты укытучылары, мәктәп мөдирләре әлеге чара барышында берничәгә бүленеп мастер классларда булды. Биредә белем бирү ысуллары, Ризаэтдин Фәхретдин иҗаты буенча фикер алышулар булды.

Аннан мәктәп залында чыгышлар оештырылды. Беренче чыгышны Чаллы каласының мәгариф һәм яшьләр белән эшләү идарәсе башлыгы урынбасарыНәркиз Кашапов ясады. Ул Чаллыда милли белем бирүнең торышы хакында бәян итте. Нәркиз әфәнде сүзләренчә, Чаллыда татар мәктәпләре, лицей һәм гимназияләр саны унбер икән. Аларда 2644 укучы белем ала. Балалар бакчаларында 53% балага ана телендә тәрбия бирелә. Гәрчә моңарчы активистлар Чаллыда гына түгел, бар Татарстанда бер генә чын татар мәктәбе дә калмавы хакында белдереп килә иде. Әлеге вазгыятькә Татарстанның мәгариф һәм фән министры урынбасары Илдар Мөхәммәтов үзенең чыгышында беркадәр ачыклык кертте.

Илдар Мөхәммәтов

“Татар мәгарифе, мәктәпләрдә, балалар бакчаларында ана телебездә тәрбияләү торышы даими тәнкыйтьләнә. Татар мәктәбе, татар балалар бакчасы дигән исемнәр бар. Ләкин исемнәре җисемгә туры килми, диләр. Шуңа җәмәгатьчелек белән булган очрашуларда үз сүзләребезне җиткерәсе килә”, дип башлады ул сүзен.

Мәктәпләрдә, балалар бакчаларында милли юнәлештә адымнар ясасак, авыр сүзләр әйтмәсләрме, дигән курку булырга тиеш түгел. Башны югарырак күтәреп эшләргә кирәк

Алга таба ул башкарылган эшләрне барлап, аерым алганда 2030 елга кадәр Татарстанда милли мәгариф концепциясе дип аталган “сәяси документ” мисалын китерде. Ләкин “әгәр дә урыннарда эш тиешле дәрәҗәдә куелмаса, милли мәктәп чын мәгариф учагын күтәрүдә эшләмәсә, бернинди декларатив документлар үзгәрешләр кертә алмаячак”, диде министр урынбасары һәм урыннардагы мәгариф хезмәткәрләрен кыюрак булырга, башны югарырак күтәреп эшләргә өндәде.

“Министр Энгел Фәттахов милли мәгарифкә бик хәерхаһлы, дәүләт органнары һәм җәмәгатьчелек тарафыннан хуплау гаять зур. Әгәр мәктәпләрдә, балалар бакчаларында милли юнәлештә адымнар ясасак, авыр сүзләр әйтмәсләрме дигән курку хисләре булырга тиеш түгел. Башны югарырак күтәреп эшләргә кирәк”, диде ул һәм БДИ дигән сылтау белән яшәүдән туктарга чакырды.

Укуда катнашучылар

Татарча укыса, минем балам БДИны бирә алмый, диючеләр бар. Тупасрак әйтәмдер, ләкин, баш эшләмәгәнне телгә сылтарга ярамый

“Кызганычка, балалар бакчаларындагы төркемнәребез татар төркемнәре дип ачыла да, урысча тәрбия бирүгә күчә. Без кечкенәдән үк балаларыбызга ана телен сеңдереп калмасак, мәктәп яшендә эшләү авыр булачак. Мәктәпләрдә дә ата-аналар таләбе, БДИ дигән булып, беренче сыйныфтан ук урысча укыта башлыйлар. Ул имтихан бит әле 11нче сыйныфта гына. Әйтерсең лә безнең бала ун ел буе урысча укыса гына кеше була. Бу бит үз-үзеңне алдау. Үз телеңә карата мәгънәсезлек булып торадыр. Татарча укыса, минем балам БДИны бирә алмый диючеләр бар. Тупасрак әйтәмдер, ләкин баш эшләмәгәнне телгә сылтарга ярамый. Республикада инглиз, татар телләрендә укып та БДИны рәхәтләндереп биргән балалар күп. Урысча гына укысак, яхшы булачак дигәнне гомумән аңламыйм. Татарстан укучылары урысчаны да яхшы белә. 2009 елдан бирле урыс теле имтиханы буенча Русия төбәкләренең уртача күрсәткеченнән югарырак урында барабыз. Бала мәктәптән зыялы шәхес булып чыгарга тиеш. Аны кечкенәдән үк ана телендә тәрбияләү һәм укыту зарур”, диде диде Илдар Мөхәммәтов һәм укытучыларга, мәктәп мөдирләренә мөрәҗәгать итеп, милли белем бирүне 90нчы еллардагы кебек җанландырып, яңартып җибәрергә чакырды.

Әлеге чыгышны укытучылар көчле алкышлар белән кабул итте.

Ризаэтдин Фәхретдин укуларына багышланган чарада милли мәгариф, ана теле торышына кагылышлы тагын бер чыгыш булды һәм анысын да кул чабып, рәхмәт әйтеп кабул иттеләр. Филология фәннәре докторы, профессор Хатыйп Миңнегулов чыгышы булды ул.

Хатыйп Миңнегулов

Әгәр телебез бетеп бара икән, милләтебезгә шундый инкыйраз яный икән, сабыр итүдән ни файда?

“Сез - яшь балага беренче аң-белем бирүчеләр. Сез гадәти укытучы гына түгел, сез сәяси-иҗтимагый тормышны әйдәп баручылар. Татар теле һәм әдәбияты укытучыларына нинди генә рәвешләрдә, кем генә булырга туры килми. Сезнең хезмәтне акчалатага күчерсәң һәм 3-4 тапкыр арттырсаң да артык булмас иде.

Безне сабырлыккка өйрәттеләр. Сабырлык әйбәт. Ләкин заманасы шундый. Әгәр телебез бетеп бара икән, милләтебезгә шундый инкыйраз яный икән, сабыр итүдән ни файда? Шуннан чыгып, безгә мәгарифебездә ниндидер хәрәкәт итү юлларын эзләргә, табарга һәм таләп итәргә кирәк. Ата-аналарга да аңлату зарур. Сорамаган балага ими бирмиләр”, диде Хатыйп әфәнде һәм Чаллыдагы иҗтимагый-сәяси тормышка да беркадәр тәнкыйть сүзләрен җиткерде.

“Милли юнәлештә Чаллы алдынгы иде. Бу эшләрдә Чаллы аеруча җаваплы шәһәр. Ләкин инде милли рух, эшләре сүнеп бара. Соңгы елларда биредә зурлап башкарылган, горурланырлык гамәлләрне күрмәдем һәм ишетмәдем. КамАЗ дип кенә булмый. Иҗтимагый һәм милли яшәеш, алга барыш турында да уйланырга вакыт. Бу үзгә шәһәр. Чаллыда зур нәрсәләр хәл ителде, кызганыч, монда инде фәнни-мәдәни яктан үсеш күзәтелми”, дип белдерде галим.

Ризаэтдин Фәхретдин әсәрләре

Туган көнең белән, Риза казый!

angel — Sat, 14 Jan 2017 18:21:54 GMT

Уфада мәгърифәтче Ризаэтдин Фәхретдинне дога белән искә алдылар

angel — Sat, 14 Jan 2017 05:32:12 GMT

Чыганак: АЗАТЛЫК РАДИОСЫ, сылтама: http://www.azatliq.org/a/28232089.html

13 гыйнвар Уфаның "Ихлас" мәчетендә мәгърифәтче, галим, җәмәгать эшлеклесе Ризаэтдин Фәхретдин тууына 158 ел тулу уңаеннан "Түгәрәк өстәл" узды. Анда галимнең мирасы, "Ризаэтдин Фәхретдин укулары" үткәрү кирәклеге, басылмаган бихисап хезмәтен дөньяга чыгару кирәклеге турында сөйләштеләр.

Чара җомга намазы уку белән башланды. Аны Ризаэтдин Фәхретдиннең якташы, Әлмәт районының Кичүчат авылы вәкилләре дә катнашты. Җомга хөтбәсен Кичүчат авылының Ризаэтдин Фәхретдин исемендәге мәчете имам-хатибы Фәһим Әхмәтҗанов укыды. Ул Коръәннең "Гасыр" сүрәсе турында тәфсир бирде, аның мәгънәсен аңлатты. Моңа кадәр күрше республика имамнарының вәгазь укыганнары юк иде.

Җомга намазында

Җомга намазыннан соң мәчетнең конференц-залында "Түгәрәк өстәл" чарасы узды. Анда Әлмәт районының Кичүчат авылы музее мөдире, филология фәннәре кандидаты Диларә Гыймранова, Әлмәт районы башкарма комитеты карамагындагы иҗтимагый һәм дини берләшмәләр белән эшләү бүлеге мөдире Даут Мөхәммәтҗанов, Башкортстан диния нәзарәте рәисе урынбасары Айнур Арсланов, Башкортстан педагогия университетының мөселман мәгарифе фәнни-тикшеренү үзәге мөдире Данияр Габдрахманов, Русия фәннәр академиясенең Уфа фәнни үзәге галиме, тарих фәннәре кандидаты Марсель Фархшатов катнашты.

Иң кызыклы чыгышларның берсен Кичүчат авылы музее мөдире, филология фәннәре кандидаты Диләрә Гыймранова ясады. Ул Ризаэтдин Фәхретдиннең тормыш юлы һәм күпкырлы эшчәнлеге турында сөйләп, биш яшендә гарәп имлясында укый һәм яза белүе, аның галим булачагын күзаллап җиде яшендә үк Чистай мәдрәсәсенә укырга җибәрүләре, 21 ел Түбән Шәлче авылы мәдрәсәсендә укуы, соңыннан хәлфәлек итүе, шәкертләргә белем бирүе турында сөйләде.

Диларә Гыймранова

Оренбурдагы эшчәнлеге турында Диләрә ханым шулай диде: “1906 елда аны Оренбурга чакыралар. Ул “Вакыт” гәзитендә эшли башлый. Бер елдан Закир һәм Шакир Рәмиевләр “Шура” журналын чыгара башлый. Аның баш мөхәррире Риза Фәхретдин була. Журнал ун ел нәшер ителә, шул чорда ул энциклопедик басма булып таныла. Аның тулы саннары бүген Финляндиядә генә саклана. Казан дәүләт университетының Лобачевский китапханәсендә дә берникадәр саннары бар, булганнарының битләре ертылып беткән.”

Диләрә Гыймранова Риза Фәхретдиннең Уфада казый, мөфти булып эшләве турында сөйләде. Чыгышын якташларының аның исемен мәңгеләштерү юлындагы эшләре, музей эшчәнлеге турында сөйләү белән тәмамлады.

Марсель Фархшатов

Ризаэтдин Фәхретдиннең мирасы турында Русия Фәннәр академиясенең Уфа фәнни үзәге галиме, тарих фәннәре кандидаты Марсель Фархшатов чыгыш ясады:

“Ризаэтдин Фәхретдиннең мирасы тау кебек зур. Аның иң зур өлеше Уфа шәһәрендә саклана. Ул Уфада 33 ел эшләгән, шуңа аның күп китаплары, кулъязма китаплары бездә саклана. Анда кырыктан артык том, күләме 11 меңнән дә артык бит. Алар арасында Ризаэтдин Фәхретдиннең басылган әсәрләре дә бар, әмма күбесе басылмый калган әсәрләр, аңа язылган хатлар, үзенең язган хатларының нөсхәләре бар. Бу мирас галимнең тормыш һәм хезмәтен өйрәнүдә зур нигез булып тора. Ул 20нче елларда китапларының кайбер өлешен Петербурдагы Шәрекъ институтына җибәрә. Шулай ук бик күп кулъязмалары архивларда саклана, чөнки аның басылмыйча калган әсәрләре дә бик күп. Аларны без җыеп, кайберсен тәрҗемә итеп, нөсхәләрен алып эшне дәвам итәбез.”

"Түгәрәк өстәл"дә ел саен "Ризаэтдин Фәхретдин укулары" уздыру кирәклеге билгеләнде, галимнең туган ягына сәфәр оештыру һәм башка мәсьәләләр турында сүз барды.

Башкортстан диния нәзарәте рәисе урынбасары Айнур Арсланов чыгышында ике яклы багланышка зур бәя бирде.Татар һәм башкорт халыклары, республикалар бергә булганда зур эш башкарып булуын ассызыклады.

Чыганак: http://www.azatliq.org/a/28232089.html?ltflags=mailer

Лениногорскиның Түбән Чыршылы авылында “Иманлы төбәк җәүһәрләре” китабы тәкъдим ителде

angel — Tue, 06 Sep 2016 09:53:35 GMT

Роза Абзалова-Сәлманованың бу китабы әлеге авылның үткәне, күренекле кешеләре, шулай ук Ризаэддин Фәхреддиннең нәсел тамырлары турында турында сөйли

(Казан, 23 май, “Татар-информ”, Миләүшә Низаметдинова). Халкыбызның мәшһүр мәгърифәче галиме, тарихчы, дин белгече, җәмәгать эшлеклесе һәм журналист Ризаэддин Фәхреддиннең тууына 150 ел тулу уңаеннан, ул 10 ел буена сабак алган һәм шуның кадәр үк вакыт белем биргән авылда - Лениногорск районы Түбән Чыршылыда (борынгы исеме - Чәшеле) кичә стела ачылу тантанасыннан соң, авылның Мәдәният йортында китап туе үткәрелде.

Шушы төбәктә - күрше Югары Чыршылыда туып үсеп, озак еллар укытучы булып эшләгән һәм хәзерге вакытта иҗат эше белән шөгыльләнүче Роза Абзалова-Сәлманованың “Иманлы төбәк җәүһәрләре” китабында (Казан: “Сүз” нәшрияты, 2008. – 272 б.) авыл тарихы, аның мәгърифәт учагы булган мәдрәсәнең эшчәнлеге, күренекле кешеләре, авылга бәйле зур вакыйгалар киң яктыртыла. Басма сирәк очрый торган һәм бүгенге көн өчен кыйммәтле, кызыклы фотосурәтләр, документлар белән баетылган, Бикчура хан, Ризаэддин Фәхреддин, башка күренекле, укымышлы шәхесләрнең шәҗәрәләре, нәселләре турында мәгълүматлар бирелгән, гомумән, китап авылга һәм аның кешеләренә мөнәсәбәте булган һәм хәзер илнең төрле төбәкләрендә гомер итүчеләрнең истәлекләренә нигезләнеп язылган.

Китап тәкъдим итү чарасында Ризаэддин Фәхреддиннең туган авылы Кичүчаттагы (Әлмәт районы) мемориаль музее директоры Диләрә Гыймранова, Ризаэддин Фәхреддин нәселенең 14-15 нче буын вәкиле педагог Венера Әхмәрова-Сөләйманова, филология фәннәре докторы Марсель Әхмәтҗанов, ТР Язучылар берлегенең Әлмәт төбәге бүлеге рәисе Данил Салихов, язучы Әсхать Сәлахов һ.б. катнашып, истәлекләре, фикерләре белән уртаклаштылар, кайсылары нәсел тамырларын барлады. Татар җыр-моңары белән ямьләндерелеп торган сәхнә түренә чыгып сүз алучының һәркайсы китап авторының хезмәтен югары бәяләп, рәхмәт сүзләрен җиткерде. Шулай ук авылның үзәк урамнарының берсенә Ризаэддин Фәхреддин исеме бирергә, дигән тәкъдим дә булды. Анда әйтелгән уртак фикер шул: нәсел җепләрен барларга, туган төбәкнең тарихын әйбәтләп өйрәнергә, тулыландырырга, киләчәк буын алдында оят булмасын өчен, аны бары тик матур гамәлләр белән баетырга, яшьләрне үрнәк затлар өлгесендә тәрбияләргә.

Ризаэддин Фәхретдиннең туган авылында

angel — Tue, 23 Aug 2016 09:37:49 GMT

Әй Кичүчат! Кичүчат!

Очрашуга без бик шат...

С.Сөләйманова

18 нче август көнне нефть төбәгенең бер төркем язучылары: күренекле мәгърифәтче Ризаэддин Фәхретдиннең туган авылы Кичүчатта булып, китап укучылар белән очраштылар.

Язучы халык белән, укучысы белән аралашып, аларның борчу-мәшәкатен, шатлык-куанычын белеп яшәгәндә нәтиҗәле иҗат итә. Авыл җирендә эшнең кайнап торган вакыты булуга карамастан, Г.Тукай исемендәге дәүләт премиясе лауреаты шагыйрә К.Булатова, С.Сөләйманова исемендәге кызыксындыру премиясе лауреаты шагыйрә, җирле телевидениеның “Җомга” тапшыруы алып баручысы Н.Сабирҗанова, Р.Төхфәтуллин премиясе лауреаты язучы З.Захарова, шагыйрә, композитор Л.Аланлы һәм Әлмәт язучылар оешмасы җитәкчесе язучы Р.Шаһиев – китап укучыларның көтеп алынган кунагына әйләнделәр.

Очрашуда Җирле үзидарә башлыгы Р.Шәйхетдинов, мәдәният йорты җитәкчесе М.Гафиятуллина, мәктәп укытучылары, китап сөючеләр катнашты. Әдәби очрашуны китапханә мөдире Г.Бикмучева алып барды. Китап сөючеләр белән җанлы аралашу кызыксындырган сорауларга җаваплар җырлар белән үрелеп барды.

Рәфкать Шаһиев

Чыганак: http://www.sptatar.ru/index.php

Бала йөрәге–ак кәгазь

angel — Mon, 01 Feb 2016 09:44:36 GMT

“Тәрбиясе җитешмәгән җирдә гүзәл ашлык җитешмәгән кебек,

тиешле тәрбия бирелмәгәндә –гүзәл кеше дә җитешмәс.”

Ризаэддин Фәхреддин.

Унөченче республикакүләм Ризаэтдин Фәхретдин укулары быел Мамадышның 3нче санлы урта мәктәбендә үткәрелде. Аңа республика районнарыннан дистәләгән татар теле һәм әдәбияты укытучылары, мәгариф бүлекләренең милли мәгариф һәм төбәк-ара хезмәттәшлек буенча методистлары килгән иде.

– Соңгы вакытларда ел саен гыйнвар ахырында һәм февраль башында җыелып, милли мәгариф юнәлешендә башкарылган эшләргә йомгак ясыйбыз. Ризаэтдин Фәхретдиннең әхлак тәрбиясе юнәлешендәге хезмәтләренең тормышка ашырылуын барлыйбыз. Ул, асылташ кебек, бик күп яктан ялтырап китә. Аны өйрәнеп бетерү мөмкин түгел. Быелгы укуларга да 300дән артык укытучы, катнашырга теләк белдереп, эшләрен җибәргәннәр иде. Монда чыгыш ясау өчен яңа фикерләр булган эшләрне генә сайлап алдык, – диде Татарстан һәм фән министрлыгының милли мәгариф бүлеге җитәкчесе Алсу Шәрипова.

Бүгенге фән-техника казанышлары тормыш-көнкүрешебезгә зур тизлек белән керә барган, компьютерлаштыру яшәеш рәвешебезне яулап алган заманда милли үзаңны саклау, милли тәрбия багланышларын яңарту аеруча мөһим. Кунаклар районыбызда бу юнәлештә гаять киң кырлы эшләр башкарылганын күрделәр.

3нче санлы мәктәпнең фойесында ук аларны Кече Кирмәннең “Сандугач“ халык уен кораллары фольклор ансамбле үзенең сокландыргыч моңнары белән каршы алды. Рус, керәшен, татар, мари, удмурт милләте вәкилләренең йолаларына, гореф-гадәтләренә, көнкүрешләренә багышланган стендлар, күргәзмәләр әзерләнгән иде. Алар белән районыбыз мәктәпләре мөгаллимнәре һәм укучылары таныштырды. Җырлап-биеп тә күрсәттеләр. “Ак калфак“ оешмасы ханымнары да мәгариф учреждениеләре белән тыгыз элемтә урнаштырганнар. Укучы балалар татарның чәк-чәк, гөбәдия, пәрәмәч, катык, бәлеш, токмачлы аш, кыстыбый кебек милли ризыклары турында илһамланып һәм авыз суын китерерлек итеп сөйләделәр.

Муниципаль районыбыз башкарма комитеты җитәкчесенең социаль мәсьләләр буенча урынбасары Алена Смирнова кунакларга Мамадыш төбәге мәктәпләрендә милли тәрбия юнәлешендә башкарыла торган эшләр турында сөйләде. Казан федераль университеты профессоры, филология фәннәре докторы, язучы Хатыйп Миннегулов:

– Сезнең җәмгыятьтәге вазыйфагыз бик зур. Авыр, кыен, мәшәкатьле булса да, хезмәтегез игелекле. Сез бит – тел, милләт мәсәьләләрен тормышка ашыручылар, рухи хәзинәне киләсе буыннарга җиткерүчеләр, – дип, мөгаллимнәргә югары бәясен биреп киткәннән соң: – Мин Ризаэддин Фәхреддинне үз хезмәтләремдә татарның Әбугалисинасы дип атдым. Кеше нинди булырга тиеш, дип сорасалар, үзенең әхлаклылыгы, тырышлыгы, тыйнаклыгы, кешеләргә мөнәсәбәте, хезмәтләре белән Ризаэддин әфәнде моның үрнәге булып тора. Бу укулар – халкыбызны, милләтебезне берләштерә торган бер олы чара, – дип тә өстәде.

Ризаэддин Фәхретддин – ХХ гасыр татар дөньясының иң күренекле шәхесләреннән берсе: әдәбиятчы да, журналист та, тарихчы да, җәмәгать эшлеклесе дә, унбиш ел чамасы мөфти дә булган кеше. Үзеннән соң бай әдәби һәм тәрбияви мирас калдырган.

Укуларның пленар өлешендә мәктәптә милли белем һәм тәрбия эшчәнлеге хакында 3нче санлы мәктәпнең югары квалификацион категорияле укытучысы Нәзилә Фәрхуллина, тәрбияне балалар бакчасыннан башларга кирәклеге хакында Мамадыштагы “Әкият“ балалар бакчасы өлкән тәрбиячесе Фирдания Зыятдинова чыгыш ясадылар. Аннан районыбыз мәктәпләре укытучылары Энҗе Шаһиева, Гөлнара Сафина, Миләүшә Нәҗипова, Лениза Фазлыева, Зөбәрҗәт Хәйбуллина осталык дәресләре; Рәмзия Мәгъфурова, Ринат Хәйруллин, Гөлзия Сәләхетдинова, Рузилә Нәкыйпова тәрбия сәгатьләре күрсәттеләр. Ахырдан дүрт секциядә укуларга килгән хезмәтләр тыңланды. Эшләре иң яхшылар дип сайлап алынган һәм укуларга чакырылган мөгаллимнәргә республика Мәгариф һәм фән министрлыгының сертификатлары тапшырылды.

Минневәрис Мингалиев тексты һәм фотосы.

Чыганак: Татарстан Язучылар Берлеге Сайты

Риза Фәхреддин авылында фестиваль

angel — Sun, 16 Aug 2015 07:41:26 GMT

Күренекле дин галиме, мәгърифәтче Ризаэддин Фәхреддиннең тууына 155 ел тулу уңаеннан Әлмәт районы Кичүчат авылында мәдәни-гыйльми фестиваль булды. Галимнең туган ягына “Сәләт-Чаллы” җәйге аланында ял итүчеләр җыелды.

Аларга Кичүчат, Мәмәт, Әлмәт шәһәренең 1 нче мәктәп һәм Р.Фәхреддин исемендәге 1 нче гимназия укучылары да бик теләп кушылды. Данлыклы Кичүчат җирлегендә узучы әлеге фестиваль Әлмәт районы башлыгы М.Салихов, "Татнефть" ААЖ җитәкчелеге, Кичүчат авылы имам-хатыйбы Мисхәт хәзрәт Садриев һәм башкаларның кайгыртучанлыгы һәм тырышлыгы нәтиҗәсендә узды, дип хәбәр итә Татарстан Диния нәзарәтенең матбугат үзәге.

14 августта фестивальне ачу тантанасында Әлмәт районы һәм шәһәре имам-мөхтәсибе Фәһим хәзрәт Әхмәтҗанов үзенен хәер-фатихасын биреп, Р.Фәхреддиннең туган җирендә җыелу - галимебезне данлау, аның мирасын таныту дип билгеләп үтте. “Һәр кешегә сәләт бирелгән. Аллаһы Тәгалә аны ачарга, күрсәтә белергә насыйп итсен”, - дип, ул фестивальдә катнашучыларга күңел көрлеге, иман байлыгы, күтәренке кәеф, сәламәтлек теләде. “Сәләт” татар яшьләр оешмасына нигез салучы, ТР Фәннәр академиясе вице-президенты, КДУ профессоры Җәүдәт Сөләйманов, ТР ФА Ш.Мәрҗәни ис.Тарих институты фәнни-тикшеренү үзәгенең баш фәнни хезмәткәре Фаяз Хуҗин һәм башкалар әлеге чарада Р.Фәхреддин мирасы белән танышу, аны өйрәнүнең әһәмиятле булуын ассызыкладылар

Сәләтле балалар һәм яшьләрнең талантларын ачу, үстерү белән шөгыльләнүче “Сәләт-Чаллы” иҗтимагый оешмасы җитәкчесе Фәрит Мөдәрисов фестиваль программасының бик бай булуын ассызыклап узды.

http://intertat.ru/tt/society-tt/item/35245-riza-fәhreddin-avyilyinda-festival.html

Сөембикәнең "энеләре һәм сеңелләре" бәйге аша барлана

angel — Thu, 02 Apr 2015 07:45:20 GMT

4 апрельдә “Ярдәм” мәчетендә әдәп-әхлаклы булу һәм дөрес итеп Коръән уку буенча “Сөембикә энеләре һәм сеңелләре” дигән бәйге
булачак. Әлеге бәйге инде 18 нче тапкыр уздырыла.
Әлеге бәйге сораулары “Мөслимә” газетасының гыйнвар-февраль саннарында басылды. Бәйгенең максаты — баллаарга динебез нигезләре белән беррәттән, үзебезнең татар галимнәре-мәгърифәтчеләренең эшчәнлеген төшендерү.

4 апрель көнне 9:00 сәгатьтә башланачак бәйгегә укучылар Кол Гали, Кол Шәриф, Шиһабетдин Мәрҗани, Һади һәм Садри Максудилар,
Каюм Насыйри, Муса Бигиев, Галимҗан Баруди, Габдулла Тукай, Акмулла, Риза казый Фәхреддин, Хөсәен Фәезханов, Гатаулла һәм Сафа Баязитовлар, Хөснулла ахун Баһаветдин, Батырша, Әхмәт Тимер, Закир ишан Камалов, Чистави, Хөсәен Әмирхан, Курсави, Утыз Имәни, Хәниф Вәлиев, Мөхәммәтҗан Хөсәенов, Исмәгыйль Гаспралы, Зәйнулла ишан Рәсүлев, Әхмәтзәки Сафиуллин, Габделхак Саматов, Сөембикә, Мөхлисә Бубый, Фатиха Аитова, Зәйнәп Хәсәни, Зөһрә Акчурина, Рәшидә Исхакый... кебек шәхесләр, аларның эшчәнлеге, әсәрләре турында да мәгълүматлы булып килергә тиеш.

http://intertat.ru/tt/yanalyklar/item/42981-sөembikәneң-enelәre-һәm-seңellәre-bәyge-asha-barlana.html

Туган көнең белән!

angel — Sat, 17 Jan 2015 04:55:10 GMT

Бүген синең туган көнең! Алдагы елларда да шулай кешеләр хәтереннән чыкма, аларга тормышларында якты маяк бул!

Төрле дин вәкилләре хезмәттәшлек, гыйлем хакында сөйләште

angel — Sun, 23 Nov 2014 16:09:35 GMT

21 ноябрьдә РИУ да Татарстан мөфтие Камил хәзрәт Сәмигуллинның Рус православие чиркәвенең Синодаль бүлеге рәисе Всеволод Чаплин белән очрашуы үтте. Очрашуда шулай ук мөфти урынбасары, РИУ ректоры Рәфыйк Мөхәммәтшин, мөфти урынбасары Рөстәм хәзрәт Хәйруллин катнашты.

Татарстан мөфтие кунакка мөселманнар оешмасы эшчәнлеге, республикадагы динара хезмәттәшлек һәм дини уку йортларында гыйлем туплау хакында сөйләде.

Очрашу барышында Рәфыйк Мөхәммәтшин кунакка истәлекле бүләкләр тапшырды. шулай ук Всеволод Чаплин дини югары уку йорты мөгаллимнәре белән аралашты.